بعض الأماكن تزورها وتمشي، وبعضها تحس إنها بيتك الثاني. من أول خطوة في سوق البراحة، تسبقك ريحة العود والقهوة العربية والبخور، وتسمع السوالف من الدكاكين، وتمشي بين دواعيس تذكرك بفرجان المحرق القديمة. هناك تلقى الحلوى والتمر والعطور وكل التفاصيل اللي ترجعك لأجمل ذكريات البحرين. سوق بحريني بروح المحرق الأصيلة، يجمع كل شيء يحبه قلبك من ماضي البحرين، لكن بلمسة عصرية تناسب اليوم. وإذا كنت تدوّر سبب تزوره هالموسم، عندنا لك خمسة أسباب إضافية تخلي الزيارة تستاهل أكثر.
١. حلوى المحرق كلها في سوق واحد
ما تكتمل زيارة للمحرق بدون حلوى، وسوق البراحة يجمع لك أسماء يعرفها أهل البحرين من سنين. من حلويات شويطر اللي صارت محطة أساسية لكل زائر، إلى حلويات الخلود ومروج المحرق، ونوصل إلى العقيلي بطعمه الأصيل اللي يذكّر بلمة الأهل و يمعات زمان. وإذا كنت من محبين الحلويات الشعبية، لا يفوتك الخنفروش البحريني وخبز الرقاق الطازج اللي تنشم ريحته قبل لا توصله. ولعشاق الأكلات البحرينية، يظل الكباب البحريني من النكهات الأصيلة اللي لازم تنجرب أثناء جولتك في السوق. أما لقيمات الطيبين، فطابورها الطويل يقول كل شيء؛ والقاعدة هني بسيطة: اللقيمات تنطلب حارّة، وحلاتها تنأكل في مكانها.
٢. ريوق بحريني وغدا على أصوله
إذا تبي تبدأ يومك صح، لازم تبديه بريوق بخبز بحريني، جباتي، وكل اللي يذكرك بريوق الجمعة في البيت العود. وإذا يا وقت الغدا، فريج بن رشدان يقدم لك نكهات بحرينية بطابعه الخاص وأطباق تعكس أصالة المطبخ المحلي. وبين الوجبتين؟ استكانة شاي من راعي الجاي أو كوب كرك يعدّل المزاج، أو وجبة من جان برجر ترجعك بطعمها وأجوائها إلى ذكريات الثمانينيات وأيامها الحلوة.
٣. ريحة تبقى معاك
العطور والبخور جزء من هوية أي سوق خليجي، وهني تلقى أسماء كبيرة عطورات جنيد وعبدالصمد القرشي وأطياب المرشود، ومع محلات عطور محلية تخليك تجرب وتقارن وتطلع بعطر يترك انطباع يدوم. لا تستعجل، العطر الصح ياخذ وقته.
٤. كل شي تحتاجه، وأشياء ما كنت تدوّر عليها
السوق مقسّم بشكل يريّحك: تمور وبهارات، قدوع وحلويات، ذهب ومجوهرات، أقمشة وخياطة، سجاد وتحف وأعمال يدوية. يعني تقدر تخلّص مقاضي البيت، تفصّل ثوب أو عباية، وتطلع بقطعة أنتيك ما كانت في بالك أبداً. ولا تنسى مخللات المحرق، تراها تخلص بسرعة.
٥. دايماً فيه شي يصير
السوق ما يهدأ. من احتفالات الأيام الوطنية ، إلى الليالي العُمانية و المنتوجات المغربية، وفعالية البراحة الشتوية بأجوائها البرية وخيامها، إلى أركان الألعاب الشعبية وزوايا الحرفيين البحرينيين وفي كأس الخليج، كانت الشاشة الكبيرة عند البوابة ١ مكان اللمة. تابعونا على @souq.albaraha عشان ما يفوتكم شي.
سوق البراحة مو بس مكان تمر عليه… هو مكان نعيش فيه لحظات، وناخذ منه ذكرى، ونخلّي فيه جزء منّا. ولضيوفنا من السعودية والخليج، هذا المكان اللي تشوفون فيه البحرين مثل ما نشوفها إحنا. حياكم بين أهلكم وناسكم .
قبل لا تروح
الموقع: ديار المحرق، قريب من مجمع مراسي و سوق التنين
أوقات العمل: السبت إلى الأربعاء من ١٠ ص إلى ١٠ م. الخميس و الجمعة من ١٠ ص إلى 11 م
الخدمات : مواقف متعددة، خدمة صف السيارات، وشحن للسيارات الكهربائية, عربات الأطفال , كراسي متحركة لكبار السن .
الصلاة: مسجد ومصليات
للتواصل: +973 1333 3060